കോഴിക്കോട് കുതിരവട്ടം മാനസികാരോഗ്യ കേന്ദ്രത്തിലെ യുവതിയുടെ മരണം കൊലപാതകമെന്ന് പോസ്റ്റ്‌മോര്‍ട്ടം റിപ്പോര്‍ട്ട്. കഴുത്ത് ഞെരിച്ചും ശ്വാസം മുട്ടിച്ചുമാണ് കൊലപാതകം നടത്തിയതെന്നാണ് കണ്ടെത്തല്‍. മാനസികാരോഗ്യ കേന്ദ്രത്തിലെ തന്നെ മറ്റൊരു അന്തേവാസിയാണ് കൊല നടത്തിയതെന്നും കേസെടുത്തതായും പൊലീസ് അറിയിച്ചു. ജീവനക്കാര്‍ക്ക് വീഴ്ച ഉണ്ടായോ എന്നത് സംബന്ധിച്ച് ആരോഗ്യവകുപ്പ് അന്വേഷണം നടത്തുന്നുണ്ട്.
വ്യാഴാഴ്ച പുലര്‍ച്ചെയാണ് കുതിരവട്ടം മാനസികാരോഗ്യ കേന്ദ്രത്തില്‍ യുവതിയെ മരിച്ച നിലയില്‍ കണ്ടെത്തിയത്. മഹാരാഷ്ട്ര സ്വദേശിയായ ജിയോ റാം ലോട്ട് ആണ് മരിച്ചത്. സംഭവത്തില്‍ പൊലീസ് അസ്വാഭാവിക മരണത്തിന് കേസെടുത്തിരുന്നു. ബുധനാഴ്ച വൈകിട്ടാണ് മരണം സംഭവിച്ചിരിക്കുന്നത്. അന്നേ ദിവസം ജിയോ റാം ലോട്ടും കൊല്‍ക്കത്ത സ്വദേശിനിയായ മറ്റൊരു അന്തേവാസിയും തമ്മില്‍ സെല്ലിനുള്ളില്‍ അടിപിടി ഉണ്ടായിരുന്നു. തുടര്‍ന്ന് പരിക്കേറ്റ കൊല്‍ക്കത്ത സ്വദേശിനിയെ മറ്റൊരു റൂമിലേക്ക് മാറ്റിപ്പാര്‍പ്പിച്ചിരുന്നു. എന്നാല്‍ ജിയോ കൊല്ലപ്പെട്ടത് രാവിലെയാണ് അധികൃതര്‍ അറിയുന്നത്.
യുവതിയുടെ ശരീരത്തില്‍ മര്‍ദ്ദനമേറ്റതിന്റെ പാടുകള്‍ കണ്ടെത്തിയിരുന്നു. ചെവിയില്‍ നിന്നും മൂക്കില്‍ നിന്നും രക്തം വന്ന നിലയിലാണ് മൃതദേഹം കണ്ടെത്തിയത്. തലയ്ക്ക് പിന്നില്‍ അടിയേല്‍ക്കുമ്പോള്‍ ഉണ്ടാകുന്നതിന് സമാനമായ മുഴയും ഉണ്ടായിരുന്നു. കഴിഞ്ഞ ജനുവരിയിലാണ് യുവതിയെ മാനസികാരോഗ്യ കേന്ദ്രത്തില്‍ പ്രവേശിപ്പിച്ചത്.
സംഭവത്തില്‍ പ്രതിയുടെ മാസികാവസ്ഥയും മറ്റും സംബന്ധിച്ച് ഡോക്ടറുമായി ചര്‍ച്ച ചെയ്ത ശേഷം മാത്രം പൊലീസ് മറ്റു നടപടികളിലേക്ക് കടക്കൂ.
Facebook
Twitter
